འདིར་འཁོར་འདས་ཀུན་གྱི་གཞིའི་ཐོག་ཏུ་རིག་པའི་གདེངས་རང་ཉིད་ཀྱིས་ཐོབ་རྒྱུའི་ཆ་རྐྱེན་དུ་ཤེས་རབ་རང་བྱུང་གི་རྟགས་མ་ཡིན་ནམ་ཞེས་རང་གི་བླ་མར་གསོལ་བ་བཏབ་པའི་དཀྱུས་སུ་འབྱུང་བའི་རྗེས་སུ་དྲན་པ་འདི་ལྟར།
ད་ལྟ་ཉིད་དུ་གཅིག་པུར་སྡོད་དགོས་པའི་དབེན་པའི་གང་ཟག་འདི་ནི་མི་རྟག། ད་ལྟའི་ཤེས་པ་དེ་བཞིན་དུ་མི་རྟག་པ་ཡིན་པ་ལྟར། དེའི་རྒྱུན་འབྲེལ་རང་རིག་ཟེར་བ་ནི། དེ་འདྲའི་རྒྱུན་འབྲེལ་གྱི་ད་ལྟ་བའི་ཤེས་པ་རང་གིས་རང་རིག་པའི་གྲུབ་བྱེད་གཞན་མེད་ཚུལ་དུ་གནས་པ་ལས་མངོན་སུམ་གཞན་གྱིས་སྒྲུབ་བྱེད་་མེད་པ་སོགས་སུ་ཐལ་བ་ཡིན་ཞེས་སྨྲས་ཀྱང་། ད་དུང་དེ་ལྟར་འདོད་དེ་། མཆོག་གཉིས་དང་རྒྱན་དྲུག་དགོངས་གཅིག་སྐད་གཅིག་གིས་དེ་ལྟར་མངོན་པར་དམ་བཅས་པའི་ལུང་གི་ཕྲེང་བ་མ་གྲུབ་ཀྱང་། འདིའི་དོན་ལ་ཕྱོགས་ཆོས་གཉིས་ཀྱིས་ཇི་ལྟར་ཁས་སླངས་པ་ལྟར་བཞེད་ན་ཆོག་ཆོག་ཡིན་ཞེས་བསམ་པའི་སྒོ་ནས་གོ་ཚུགས། ཕྱོགས་ཆོས་གཉིས་འདིའི་སྐབས་སུ་གླང་པོ་ཞེས་དང་། གྲགས་པ་ཞེས་པའི་སོ་སོའི་མཚན་དང་འབྲེལ་བས་བསྟན་པའི་བསྟན་བཅོས་ལས་རང་ལ་ངེས་ཤེས་འདྲ་བོ་བྱུང་།
རང་མཚན་གྱི་ངོ་བོར་མ་གྲུབ་པའི་རྟེན་ནས་བཏགས་པའི་དུས་གསུམ་ཀུན་རྫོབ་ཀྱི་ཆོས་གང་ཡིན་པ་གློ་བུར་དུ་རྣམ་པར་བཞག་པའམ་དམིགས་པའི་དོན་སྤྱི་ཡོད་ཡོད་འདྲ་བའི་སེམས་འབྱུང་གི་ཆ་རྣམས་གཏན་ཚིགས་ཀྱི་ཚུལ་དུ་བཀོད་ཡོད་ཞེས་རྟོག་པས་རློམ་ཀྱང་། དེར་བསྡུས་པའི་ཕྱོགས་དང་ཆོས་དང་མཐུན་མི་མཐུན་གྱི་རྟགས་སམ་དཔེའི་ཆ་རྣམས་གཏན་ཚིག་གི་བརྗོད་པའམ་ཡིག་རིས་སུའཇོག་པས་ད་ལྟར་ཡོད་པའི་རང་རིག་ལ་གནོད་པ་ཅི་ཚུགས། རང་རིག་མངོན་སུམ་གྱིས་ཡིན་ན་བཞན་གྱིས་རྗེས་དཔག་གང་ལེགས་པའི་གཏན་ཚིགས་ཡང་དག་ལྟར་སྣང་བའི་བྱེ་བ་འབུམ་ཕྲག་གིས་ཀྱང་གང་ཡང་མི་གནོད་ཏེ། དཔེར་ན་མོདྒལ་གྱི་བུ་ཡིས་བཅོམ་ལྡན་འདས་ཉན་ཡོད་་ཕྱོགས་སུ་བཞུགས་པའི་ཚུལ་་རྣལ་འབྱོར་མངོན་སུམ་གྱིས་ཅི་ལྟར་མཁྱེན་པ་ན། མུ་སྟེགས་ཀྱིས་དེ་འདྲ་ཕྱོགས་འདིར་མེད་ཞེས་མི་དམིགས་པའི་རྟགས་བྱེ་བ་འབུམ་ཕྲག་ཨུ་ཚུགས་ཀྱིས་བཀོད་ཀྱང་དམ་བཅའ་ལ་མི་གནོད་།
རང་རིག་ཡོད་པ་ཙམ་གྱིས་ཕ་རོལ་པའི་མངོན་སུམ་དང་རྗེས་སུ་དཔོག་པའི་གཏན་ཚིགས་ཏུ་བཀོད་པའི་ཕྱོགས་ཆོས་སོགས་རང་སོ་སོའི་ཤེས་བྱེད་དུའང་བཀོད་པ་ཙམ་མ་གཏོགས། རང་རིག་གམ་རྣལ་འབྱོར་མངོན་སུམ་སྔོན་ཡོད་དུ་ངེས་པའི་ཚད་ལ་ད་གཟོད་ཡོད་པར་ངེས་པའི་གདེངས་སུ་འཇོག་པ་ནི་རང་རིག་གི་གཞིར་པར་དགོས་ལ། རང་རིག་ཡོད་དམ་མེད་ནའང་ཆོག། དེ་ལ་འགོག་པའི་རིགས་པའང་དོན་ལ་ཐུག་མེད་དུ་ཐལ། འོ་ན་དེས་དེ་འདྲ་ཐུག་ཡོད་ཞེ་ན། མ་ཡིན་ཏེ་ཐུག་མེད་དང་དོན་མེད་དུ་ཐལ་བ་འདིར་ཅུང་ཟད་གཤད་པར་བྱ། རང་རིག་འགོག་ཟེར་བའི་་རིགས་པ་ནི། རང་ཕྱོགས་སྔ་བའི་དམ་བཅའ་འགོག་མཁན་གྱིས་སེལ་བྱའི་དོན་གྱི་གཞིའམ། ངོ་བོར་རྟོག་པའི་བཏགས་པ་བའི་ལྡོག་པ་རྟགས་སུ་རློམས་ནས་དེ་དེའི་ངོ་བོ་མ་ཡིན་པ་ཙམ་གྱིས་གཞིའི་ངོ་བོར་དེ་ག་རང་མེད་པའི་སྒྲུབ་བྱེད་དུ་ཨུ་ཚུགས་རྒྱག་ནས་ཁྱབ་པ་སྒྲུབ་ཞེས་ཟེར་བ་ལྟར་ན། འདི་སྐབས་སུ་རང་རིག་གི་གཞིར་མཚོན་ཏེ། རང་རིག་བཏགས་པ་བ་ཟེར་བའི་གཞིའི་ངོ་བོའི་ལྡོག་པའི་རིག་པ་སྐད་ཅིག་ཏུ་རྣམ་པར་འཇོག་ཏེ།
དེ་ལྟར་སྐད་ཅིག་པ་་ཡིན་པའི་རྒྱུ་མཚན་ལས་དེའི་གཞི་སམ་གནས་ལུགས་ལ་རང་རིག་པ་མེད་པར་ཁྱབ་་པར་ཐལ་ཟེར་བའི་དོན་དུ་གོ་བ་བླངས། རང་ཕྱོགས་སུ་རང་རིག་ཟེར་བ་དང་ཡེ་ཤེས་གདོད་མའི་གནས་ལུགས་ངོ་བོ་གཅིག་ཏུ་སྒྲུབ་མི་ཤེས་ན་སངས་རྒྱས་རང་གིས་རང་ཚོད་ཟིན་ཐུག་མེད་པ་དང་དང་ད་གཟོད་རྟོགས་པའི་དོན་ཡང་སྐྱར་དུ་ངེས་དགོས་པའི་ཐལ་བའི་སྐྱོན་མང་བབས་པར་ངེས།
འོ་ན་ཁྱེད་ཀྱིས་མེད་པ་ལ་ཡོད་པར་སྒྲོ་བཏགས་པའི་རང་རིག་རང་མཚན་དུ་འཛིན་པའི་བསྔལ་བ་སེལ་བའི་ཕྱིར་དུ་དོན་ཡོད་ཟེར་ན། རང་རིག་ཡོད་ན་སངས་རྒྱས་ལའང་ཡོད་། རང་སོ་སོའི་འདུག་་ཚུལ་ཡིན་པར་ཤེས་པའི་སེམས་ཅན་གྱི་གཞི་མེད་ན་འབྲས་བུ་སངས་རྒྱས་མི་འབྱུང་བའི་ཕྱིར། མ་ཁྱབ་ཟེར་ན། སངས་འཕགས་ཆོས་ཅན། གཟུགས་མེད་ཚོར་བ་མེད་སོགས་མཁྱེན་པའི་ཡུལ་ཅན་ཡིན་པར་ཐལ། ཇི་ལྟར་མཁྱེན་པའི་ཡེ་ཤེས་སྟོབས་ཀྱི་ཕྱིར་། འདོད་ན། སངས་རྒྱས་རང་རིག་ཡིན་པར་ཐལ། དེས་དེ་ཇི་ལྟར་སོ་སོ་རང་གིས་མཁྱེན་པ་ལས་གཞན་གྱིས་མ་ཡིན་པའི་ཕྱིར། མ་ཁྱབ་ཟེར་ན། ཁྱེད་སངས་རྒྱས་ཡིན་དུ་ཐལ་བའི་ཆོས་ཅན། ཁྱེད་སངས་རྒྱས་དེའི་ཡུལ་ཅན་གཞན་རིག་མངོན་སུམ་ཡིན་པར་ཐལ། སངས་རྒྱས་ལས་གཞན་པའི་སངས་རྒྱས་ཀྱིས་་ཇི་ལྟར་མཁྱེན་པའཻ་མཁྱེན་ཚུལ་དཔོག་པའི་ཕྱིར་དུ་དེ་ལྟར་སྒྲུབ་བྱེད་ཀྱི་རྟགས་མངོན་སུམ་དུ་ཁས་བླངས་དགོས་པའི་ཕྱིར། ཁྱེད་རང་རིག་ཏུའང་གྲུབ་པ་ཡིན་པར་ཐལ། སངས་རྒྱས་ཇི་ལྟ་བའི་ཡེ་ཤེས་ཡུལ་ཅན་དང་ཡུལ་གྱི་ཟུང་འཇུག་གི་ངོ་བོར་གནས་པའི་ཆོས་དབྱིངས་འདུས་མ་བྱས་པ་ལས་ལོག་ཏུ་བཟུང་བའི་ཤེས་བྱེད་རྟགས་སམ་གཞན་རིག་གི་ཤེས་པ་མེད་པའི་ཕྱིར།
རྒྱུ་མཚན་དེ་ནི་རང་གི་ད་ལྟའི་ཤེས་པ་དང་བདག་ཅིག་གི་འབྲེལ་བ་མེད་ན་གཞན་ཡིན་དགོས་སྟེ། རང་གིས་རང་གིར་རམ། ཇི་ལྟར་མཁྱེན་པའི་ཚུལ་ནི་སངས་རྒྱས་ས་ལ་དུས་གསུམ་གྱི་ཇི་ལྟར་ཇི་སྙེད་ཀྱི་ཚུལ་ཀུན་བསྡུས་པའི་ངོ་བོའམ་རོ་གཅིག་ཏུ་འགྱུརཔའི་སོ་སོ་རང་རིག་པའི་ཡེ་ཤེས་མིན་ན། དེ་ལས་གཞན་རིག་ཡེ་ཤེས་ཡིན་དགོས་པའི་ཕྱིར། སངས་རྒྱས་རང་གིས་རང་ལ་རང་བཞིན་གྱིས་དེ་ལྟར་ཡིན་པར་ངོ་མཁྱེན་ནམ་རང་རིག་པ་མི་རིགས་ན། གཞན་གྱི་རིག་ངོ་ཁོ་ནར་སངས་རྒྱས་ཇི་ལྟར་ཡིན་ཚུལ་བཞིན་དུ་མཁྱེན་པར་ཐལ།
ཧ་ཧ། འདོད་ན་ཁྱེད་སངས་རྒྱས་ལས་ལྷག་པའི་སར་གནས་པའི་གང་ཟག་ཡིན་པར་ཐལ། ཁྱེད་ལས་གཞན་དུ་སངས་རྒྱས་ཀྱི་་ངོར་ད་དུང་ད་ལྟར་རང་ཉིད་སངས་རྒྱས་ཡིན་པར་རང་ངོ་མཁྱེན་པའི་རིག་པ་མེད་པའི་ཕྱིར། ཇི་ལྟར་དང་ཇི་སྙེད་ཐམས་ཅད་མཁྱེན་པའི་ཡེ་ཤེས་ཀྱི་ངོ་བོ་གཅིག་ཐོག་ཏུ་ལྡོག་པ་ཐ་དད་སུ་མ་འགྱུར་ན་ངོ་བོ་གཅིག་དང་ལྡོག་པ་ཐ་དད་ཀྱི་བདེན་གཉིས་རྣམ་བཞག་ཀུན་ལ་སངས་རྒྱས་རང་ཉིད་རྨོངས་པར་འགྱུར་བར་ཐལ། དེ་ལྟར་ཡིན་དགོས་པའི་འབྲེལ་བ་ནི་གནས་སྣང་མཐུན་མི་མཐུན་གྱིས་དབྱེ་བའི་བདེན་གཉིས་རྣམ་བཞག་དང་། ཚུར་མཐོང་དང་དག་གཟིགས་ཐ་སྙད་དཔྱོད་པའི་ཚད་མའི་དབྱེ་བ་དང། །མེད་དགག་དང་སྤྲོས་བྲལ་གྱི་དོན་གཙོར་བྱས་པའི་རྣམ་གྲངས་དང་། རྣམ་གྲངས་མ་ཡིན་པའི་དོན་དམ་དཔྱོད་པའི་ཚད་མའི་ཚུལ་བཞིན་དུ་བརྟགས་སྟེ་མཁྱེན་པར་པར་བརྩལ་དགོས་བསམ།
ཚད་མའི་གོང་མ་མེས་དབོན་རྣམ་པ་གཉིས་ཀྱིས་མངོན་སུམ་ལྟར་བཞེད་པའི་དོན་ཡང་རང་གིས་མངོན་པར་ཡིད་ཆེས་པའི་དོན་ལྟར་ཁས་བླང་ཡོད་། འདི་ལྟར་སོན་དང་རིག་པ་ཡེ་ཤེས་དང་འབྲེལ་བ་ཞིག་མཁྱེན་པར་ཞུ་ཞེས་རྩོམ་པ་པོ་རང་གི་ཡེ་ཞེས་པའི་ཤེས་ལྷ་ཡིས་རང་ལ་བསྐུལ་མ་བལྟར་བྱེད་ནས། གོ་སྐབས་ཤུགས་ཀྱིས་བརྩམ་པར་དམ་བཅས་པའི་བརྗོད་པ་སྨྲོས་ཅི་དགོས། རང་རིག་ཡོད་ན་འཁོར་འདས་ཀུན་གྱི་གཞི་ཡང་ཡོད་པའི་གོ་ཆོད་། རང་ངོ་མ་རིག་པའི་ཤེས་སྒྲིབ་རྣམ་ཤེས་བདུན་པོའི་རྐྱེན་ཐོག་ཏུ་བསགས་པའི་གོ་ཆོད་པ་དང་། རང་རིག་རང་ངོ་ཤེས་པའི་སྒྲིབ་པ་དག་བྱེད་ཀྱི་ནུས་པ་དང་ལྡན་པའི་འཐད་པ་ནི། རང་རིག་ཐོག་ཏུ་བབས་པའི་བསམ་གཏན་ཐབས་ཀྱིས་ཟིན་པའི་རྣལ་འབྱོར་མངོན་སུམ་ཚད་ལྡན་གྱི་སར་གནས་བྱང་འཕགས་ཀྱི་རྟོགས་པ་བརྗོད་པའི་ལུང་ལྟར་གཞལ་ན། རང་ངོ་ཤེས་པའི་སྐད་ཅིག་ཅིག་གིས་རྫོགས་སངས་རྒྱས་ཞེས་གསུངས་པའི་དོན་མཐུན་གྱི་ཆོས་ཉིད་མི་འགྱུར་བའི་རང་བྱུང་ངམ་རང་རིག་པའི་ཡེ་ཤེས་དང་གཉུག་སེམས་འོད་གསལ་ལ་སོགས་པའི་རྣམ་གྲངས་ཀྱི་ཚུལ་དུ་མངོན་པར་བརྗོད་པའི་ལུང་བསྟོད་ཚོགས་དང་གསུང་གུར་དང་གསར་རྙིང་གི་རྒྱུད་ཕྱོགས་ཀུན་ནས་དྲང་འོས་པ་རེད། ཡིན་ནའང་དེ་ཚོ་ཚིག་གི་སྒྲ་ཇི་བཞིན་དུ་ང་རང་གི་དྲན་པ་ཡེ་སྦྱངས་མེད་པ་ལ་ཉམས་གསོ་ཡོངས་མི་ཐུབ་པས་འགྲེལ་བཤད་པདྨ་དཀར་པོ་ནང་དུ་དེ་འདྲའི་ལུང་ཁུངས་མ་སོགས་མཇལ་རོགས་ཞུ།
No comments:
Post a Comment