༈ བྱ་བྲལ་སངས་རྒྱས་རྡོ་རྗེ་ལ་གསོལ་བ་འདེབས་ཐུགས་བསྐུལ་སྨོན་བཅས་བཞུགས།

།ཨ་ཏི་བླ་མེད་རྣལ་འབྱོར་བྱ་དང་བྲལ། །སངས་པའི་གཞི་ཐོག་ལྷུན་གྲུབ་ཡོན་ཀུན་རྒྱས། །ཀུན་བཟང་ཐུགས་ཀྱི་རྡོ་རྗེ་འཛིན་པ་མཆོག། །སངས་རྒྱས་རྡོ་རྗེ་རྩལ་ལ་གསོལ་བ་འདེབས། །སྤྲོས་མེད་དོན་གྱི་གནས་ལུགས་གསལ་སྟོན་མཛད་། །གདམས་པའི་བཅུད་གཏེར་བསྟན་པའི་ངག་དབང་བསྒྱུར། །འགྲོ་བའི་མུན་སེལ་བཟང་པོའི་ཆོས་མཆོག་མངའ། །ཀུན་བཟང་ཐུགས་ཀྱི་རང་ངོ་ཁྱོད་ལ་ཕྱག །རྟོགས་ཚད་གསང་གསུམ་རྒྱན་དུ་རྟགས་ངོམས་བཞིན། །བླ་མེད་བླ་མའི་བླ་མར་ཀུན་བཞེད་ཀྱང་། །ཉམས་ཆུང་བྱ་ཕལ་ལྷོད་པའི་བྲོ་གར་གྱིས། །འགྲོ་བསྟན་སྲོག་གི་སྐྱབས་མགོན་གོང་ན་མེད། །བླ་མ་མཁའ་འགྲོ་སྙིང་གི་དྭངས་མའི་བཅུད་། །བཀའ་གཏེར་བརྒྱུད་པའི་ངེས་ལྡན་གང་ཟག་ཆོས། །རྣམ་གཉིས་ཕུན་ཚོགས་འབྱུང་གནས་མངའ་བདག་དང། །འདི་ཕྱིའི་བར་གསུམ་མི་འབྲལ་བྱིན་རླབས་སྩོལ། །ལྔ་བདོའི་སྣོད་བཅུད་ཉམས་པའི་ངན་དུས་ལ། །ལྟ་ཁས་མི་ཆོག་ལྔ་རྒྱན་འོད་གསལ་རྩེའི། །མྱུར་སླའི་བསྟན་མཆོག་མངོན་གཟིགས་གོ་སྐབས་ཕྱེད། །བླ་མའི་སྐུ་དྲིན་ལན་མཐའ་མེད་དོ་ཀྱེ། །སྙིགས་བདོའི་དུས་འདིར་ཁྱེད་ལས་སྐྱབས་གཞན་སུ། །དགོངས་ཤིག་རྡོ་རྗེའི་རྩལ་གྱི་དཔའ་བོ་ཁྱོད་། །མགོན་གཞན་མེད་དོ་བདག་ལ་བརྩེ་བས་གཟིགས། །རང་གཞན་མྱུར་དུ་སྒྲོལ་བའི་གདེངས་ཤིག་སྩོལ། །ལྷུན་གྲུབ་སྣང་བཞིའི་མཐར་ཕྱིན་དབང་བཞི་བསྐུར། །འགྲོ་བསྟན་མངོན་པར་རྒྱས་པའི་ལྟས་མོ་སློངས། །བུ་འདིའི་རིགས་ཀྱི་བདག་པོར་རྟག་བཞུགས་ནས། །རང་དང་མཆེད་ལྕམ་ཚོམས་གཅིག་སངས་རྒྱས་པའི། །བླ་མའི་ཐུགས་དམ་བཞིན་དུ་སྒྲོལ་བཪ་ཤོག  །ཞེས་གྱི་ན་དཀོན་མཆོག་མིང་པས་སྙིང་ནས་སྨོན་བཞིན་གྲུབ་པར་འགྱུར་ཅིག།། སརྦ་མངྒལཾ་བྷཱཝཡེཏ།